Mizoram Presbyterian Kohhran(Mizoram Synod) hi Mizorama Kristian kohhran lian ber, Wales rama Calvinistic Methodist Kohhran thlah a ni ti ila kan sawi sual awm lo e. Presbyterian Church of India (PCI) dintu pawl pakhat niin Shillong, Meghalaya-ah hmunpui a nei a ni. Mizoram Synod tia koh administrative body hian Mission Veng, Aizawl-ah hmunpui a nei a. Kohhran hmasa a nih angin Mizorama kohhran lian ber a la ni reng a ni.
Rev. William Williams chuan Khasi rama a thawh laiin Syhlet lama Mizo lung in tangte hnen atanga Mizote chanchin a lo hriatin Mizorama kal duhna a nei ta a, kum 1891 March 15-ah Mizoram a lo thleng a, March 20 khan Aizawlah a lo kal a, mistiri leh kut hnathawka inhlawhfate hnenah Pathian thu hrilin -Pathian Thu ziaktract te a sem a. Mizoram chanchin hi Welsh ramah a zu sawi a, Welsh Presbyterian Mission chuan kum 1892-ah Mizoram chu Missionary tirh luhna atan a thlang ta a. Rev. William Williams hi tirh an tum a, mahse vanduaithlak takin a thi ta mai si a. Mi thar an dap leh a; Theological College-a an zirtir chhungin hun a lo vei hman a. Hetih lai hian vanneihthlak takin Arthington-a mi tirh Rev. F.W. Savidge (Sap Upa) leh Rev. J.H. Lorraine (Pu Buanga) te kha an lo chhuak a, kum 1894, January 11-ah Mizoram an lo thleng a; Welsh Presbyterian Mission tirhin Rev. D.E. Jones (Zosaphluia) hi kum 1897, Aug. 31-ah a lo thleng ve leh ta a ni. Rev. William Williams an bul a rawn tan, Pu Buanga leh Sapupa te Chanchin Tha mei an lo chhit chu Pu Zosaphluia hian a chhem nung zui ta. Zosapthara (Rev. Edwin Rowlands chuan a rawn zawm ve leh a ni. Tichuan midang dang rawn thlengin chhum lo chat lovin Pathian thu hril leh Pathian BIak Inkhawm an nei chho zui ta a a ni. Zosaphluia hian February 18, 1898 khan Zirna leh Pathian Biak Inkhawm bul țanin hi hi chhum lo chat lova Mizorama Kohhran kal chhoh zelna a ni. Tunah hian Kohhran member 6,27,722 an awm mek a ni.
Tih belh duh, dik lo tih dik ngai te inhrilh ila
We use cookies to analyze website traffic and optimize your website experience. By accepting our use of cookies, your data will be aggregated with all other user data.